ठाणे: समाज कल्याण विभाग, जिल्हा परिषद,ठाणे मार्फत ५% दिव्यांग कल्याण सेस फंडातून सन २०२३-२४ या वर्षामध्ये राबविण्यास घेण्यात आलेल्या दिव्यांग व्यक्तिने अथवा दिव्यांगाच्या संस्थेने तयार केलेल्या वस्तूंची विक्री करण्याकरीता मध्यवर्ती विक्री केंद्राची स्थापना जिल्हा परिषदेच्या आवारात करण्यात आली असून दिव्यांग विद्यार्थ्यांनी त्यांच्या शाळेमध्ये बनविलेल्या गृहपयोगी व शोभेच्या वस्तूंसाठीचा विक्री मेळावा आयोजित करण्यात आला आहे.
यावेळी मा. अतिरिक्त मुख्य कार्यकारी अधिकारी डॉ. रुपाली सातपुते यांच्या शुभ हस्ते उद्घाटन करण्यात आले. तसेच कार्यकारी अभियंता बाधंकाम श्री. सुनिल बच्छाव, लघुपाट बंधारे विभाग प्रमुख श्री. दिलीप जोकार, उप मुख्य लेखा व वित्त अधिकारी श्रीम. अजंली अंबेकर, इतर सर्व अधिकारी, कर्मचारी, दिव्यांग शाळेचे विद्यार्थी व शिक्षक उपस्थित होते.
विक्री मेळावा दि. २२ डिसेंबर २०२३ ते २६ डिसेंबर २०२३ या दरम्यान सकाळी ९.०० ते सायंकाळी ८.०० वाजेपर्यंत ठाणे शहराचे मध्यवर्ती ठिकाण असलेले जिल्हा परिषद, प्रांगण, ठाणे स्टेशन, ठाणे (प) येथे आयोजित करण्यात आले असुन सर्वांनी या प्रदर्शनास व विक्री मेळाव्यास भेट देऊन दिव्यांग विद्यार्थ्यांनी व संस्थानी बनविलेले वस्तु खरेदीसाठी प्रतिसाद द्यावे असे आवाहन मा. अतिरिक्त मुख्य कार्यकारी अधिकारी डॉ. रुपाली सातपुते यांनी मनोगत व्यक्त करताना नागरिकांना आवाहन केले.
प्रगती अंध विद्यालय, बदलापुर येथिल दिव्यांग विद्यार्थ्यांनी विविध गाणी गाऊन प्रदर्शनाची व विक्री केद्रांची शोभा वाढवली.
स्टॉलवर विक्रीसाठी ठेवण्यात आलेल्या वस्तू
तोरण, रुमाल पेंटिंग, कार्ड फुले, ग्रीटिंग कार्ड, कृत्रिम गजरे, ज्वेलरी, कागदी फुले, कापडी पिशवी, फाईल, दिव्यांग उपयोगी काठी व इतर सर्व वस्तूचे प्रदर्शन व विक्री करण्यासाठी एकूण १८ विक्री कक्ष (स्टॉल) उभारण्यात आले आहेत.
